კოლიცია “ქართული ოცნების” ლიდერის ბიძინა ივანიშვილის განცხადებით, “ევროკომისარს გაფართოებისა და ევროპის სამეზობლო პოლიტიკის საკითხებში შტეფან ფულეს არასწორი ინფორმაცია მიაწოდეს”.
მისივე თქმით, მას ბრიუსელში წასვლა დაგეგმილი არ აქვს.
“ქცევის კოდექსს ხელი მოწერილი გვაქვს. მოატყუეს შტეფან ფულე, რომ ხელი არ მაქვს მოწერილი. მე მგონი გუშინ მას ირაკლი ალასანია შეხვდა და ყველაფერი განუმარტა. თავდაპირველად ჩვენმა ხელისუფლებამ მიაწოდა ცრუ ინფორმაცია და ამაში სპეციალისტები არიან, ამ სიცრუის ტირაჟირებაში დახმარებას კი თქვენ უწევთ”, – განუცხადა ივანიშვილმა ჟურნალისტებს.
შეგახსენებთ, რომ რადიო “თავისუფლების” ცნობით, ევროკომისარი გაფართოებისა და ევროპის სამეზობლო პოლიტიკის საკითხებში შტეფან ფილე კოალიცია “ქართული ოცნების” ლიდერს ბიძინა ივანიშვილს პარტიათა საარჩევნო ქცევის წესებზე ხელმოწერას სთხოვს. ამის შესახებ კი რადიოსთან საუბრისას ევროკომისრის სპიკერმა პეტერ სტანომ განაცხადა.
“ბიძინა ივანიშვილისგან თხოვნა მივიღეთ, რომ მომავალ კვირას ბრიუსელში შედგეს მისი და შტეფან ფულეს შეხვედრა. ბატონი ფულე მასთან შესახვედრად მზად არის, თუ მიიღებს დაპირებას, რომ ივანიშვილის პარტია “ქართული ოცნება” ხელს მოაწერს ქცევის კოდექსს საქართველოში მოახლოებული საპარლამენტო არჩევნებისათვის და რომ “ქართული ოცნებისათვის” არჩევნების შედეგები მისაღები იქნება, თუ მათ ავტორიტეტიანი სამეთვალყურეო ორგანიზაციები, უწინარეს ყოვლისა, ეუთო და ეუთო-ს დემოკრატიული ინსტიტუტებისა და ადამიანის უფლებათა ოფისი ლეგიტიმურად მიიჩნევენ”, – განაცხადა პეტერ სტანომ.